PUISI UTUH AGAK BALANGAN (NANANG BALANGAN 2012)

SANGGAM

(Sanggup Bagawi Gasan Masyarakat)

Janji Babakti Putra wan Putri Balangan

Dikarang wan ditulis Nuril Anwar

Utuh Agak (Nanang kabupaten Balangan)

Hati baulah pikir, mangganang saban siang wan malam

Kayapa cara mambahagiakan kabupaten Balangan

Si bumi SANGGAM, banua kasayangan

Manganalakan pariwisata, adat wan budaya, supaya kawa mandunia

Ui utuh…. Ui diyang !!

Ayo nah, bubuhan kita sabarataan bajuang

Mamajuakan banua kita, si Balangan sayang

Kita ini putra wan putri SANGGAM.. Sanggup bagawi gasan masyarakat

Jangan biarakan Balangan dirandahakan urang

Ui utuh …Ui diyang !!

Balangan baisi banyak bangat pariwisata nang tapandam

Diibaratakan burung Garuda nang masih maharam

Tugas kita sabarataan mambawai sanak wan kula kita

Kita bangun kabudayaan wan pariwisata, supaya Balangan makin sajahtera

Ui nanang wan galuh Balangan !!

Ayo kanalakan pariwisata wan kabudayaan

Supaya banua kita didatangi bubuhan wisatawan

Salajur jua kita mamadahakan wan kalimantan Salatan

Kabupaten Balangan, mun masalah wisata wan budaya jua kada kalah urang

Balangan SANGGAM, Balangan SAYANG !!

Ayo dangsanak ulun sabarataan,  warga Balangan

Kita basamaan bajuang wan ilmu, tanaga, harta kita sabarataan

Saikhlas hati, satulus parasaan kita mambangun Balangan

Mudahan Balangan si banua SANGGAM ini tambah disayang

Amin ya rabbal ‘alamin

Balangan, 17 Juli 2012

UTUH AGAK (NANANG  BALANGAN  2012)